لقاء مع لاعب النادي الاهلي حسن علي ابراهيم

اجرى منتدى كووورة اماراتية التابع لمنتديات كووورة لقاء مع لاعب النادي الاهلي الاماراتي حسن علي ابراهيم . واليكم الحوار الذي اجراه جمال الملا :

جمال : تدخل منتديات و مواقع رياضية ك موقع او منتديات كووورة ؟
حسن : والله شوف أنا ما أدخل الا إذا حد داخل أشوف او انه يقول شفت جي وجي , وانا ما أهتم .

جمال : ما هي أستعدادات حسن علي أبراهيم لبداية الدوري
حسن : أول شيء بسم الله الرحمن الرحيم , والله أستعدادي كإستعداد أي لاعب يكون مستعد للدوري , تعرف أنت الاعب لازم يكون مستعد وطموحة أنه يستعد للفريق ويكون جاهز علشان ينافس على الدوري إن شاء الله .

جمال : ما رأيك بإعدادات الفريق للمعسكرات ؟
حسن : والله شوف عن المعسكرات الحمدلله كل شيء متوفر لنا والحمدلله وأعتقد ممتاز والأمور كلها كانت طيبة , يعني مافي أي نقص.

جمال : ما هي توقعاتك للدوري ؟
حسن : والله أنا أتوقع للدوري منافسة قوية , نفس ما تشوف أنت الفرق كلها جاهزة , فأعتقد أن كل الأندية اللي يايبين محترفين وشافوهم , فأعتقد أنه بتكون منافسة قوية وشريفة إن شاء الله .

جمال : شو رأيك الأهلي يقدر يسترجع لقب الدوري ؟
حسن :والله مافي شيء مستحيل في كرة القدم , أكيد الأهلي فريق كبير يعني نفس ما تعرف أنت وإن شاء الله نتمنى هالسنة نحرز بطولة إن شاء الله , وإن شاء الله نآخذ البطولتين هالسنة .

جمال : حسن أنت راضي عن مستواك ؟
حسن : والله شوف , انا الحمدلله راضي عن مستواي في السنوات اللي طافت وانا الحمدلله راضي عليه واتمنى أني أقدم مستوى أحسن وللأحسن.
جمال : ويا منو تفضل تلعب في المنتخب ؟
حسن :والله شوف أنا ماعندي أي مشكلة , انا ألعب ويا أي حد , ماعندي أي مشكلة .

جمال : السنة اللي طافت شو رأيك بأداء لاعبين الأهلي ؟
حسن : والله شوف على السنة اللي طافت ما أدينا صورة طيبة وما كنا بمستوانا ف أعتقد أنهم حسوا بالمسؤولية , وأحنا ما كنا راضيين على السنة اللي طافت , ف إن شاء الله هالسنة نكون مستعدين للدوري واللعيبة كلهم مستعيدين إن شاء الله .

جمال : إن شاء الله , شو رأيك بإعلامنا وكيفية مدحهم للاعبين ؟
حسن : والله شوف انا عن الإعلام ما أتكلم لأنه الإعلام هو اللي يقوم بدورة ف نفس ما تقول يمكن الاعب اللي يكون مظلوم إعلاميا يمكن يكون مدافع أو لاعب وسط , ونفس ما تقول الجندي المجهول , والأعلام يقوم بدورة.

جمال : من هو أفضل لاعب مر على الكرة الإماراتية ؟
حسن : سابقا كان في واايد لعيبة يعني عدنان الطلياني , زهير بخيت , عبدالرزاق أبراهيم , بخيت سعد وأغلب اللعيبة كانوا مميزين الصراحة .

جمال : أفضل محترف مر على الكرة الإماراتية ؟
حسن : والله واايد لعيبة مروا , عندك علي كريمي , جورج ويا , كونتي (الوحدة) , وعندك دياكيه والحين وأليفيرا.

جمال : أي نادي تشجع بعد الأهلي , او ممكن نقول عالميا ؟
حسن : برشلونة

جمال : وتتابع الدوري الإسباني دائما ؟
حسن : أكيد أتابع ,, ولازم كل مباراة أشوفها

جمال : شو رأيك في آخر مباراة لبرشلونة ؟
حسن : والله شوف آخر مباراة أعتقد أنه فاز ب 2-1

جمال : نعم , هدفين سجلهم ميسي
حسن : هيه شوف فريقي أنا ما أتكلم عنه , يوم يفوز أنا أرتاح .

جمال : شو رأيك في العين هالموسم وتعاقدهم مع ثلاثي الفجيرة ؟
حسن :والله أتمنى له التوفيق , وبالعكس هذا شيء طيب نبى أنه الدوري يكون دوري قوي , فأتمنى التوفيق لنادي العين وللعيبة اللي أنتقلوا من الفجيرة للعين .

جمال : شو يكون برنامجك في رمضان ؟
حسن : والله شوف برنامجي في رمضان أول شيء أقوم من الرقاد وأصلي , وأيلس ويا أهلي وأخواني وبعدها أسير أصلي العصر ويوم أرجع مرات أتابع المسلسلات الرمضانية , يعني مب وايد شوية , وطبعا لازم قبل المغرب تقرأ قرآن وطبعا هذا واجب علينا , وبعدها أفطر وأرتاح شوية وبعدها صلاة التراويح ويوم أرجع أسير النادي عسب التمرين , ويوم أخلص من التمرين أسير ألاقي ربعي لين وقت السحور وأتسحر , وهكذا .

جمال : شو هي أبرز العادات اللي تحرص عليها في رمضان ؟
حسن : والله شوف أبز العادات اللي أحرص عليها أني أشوف ربعي , وأسولف وياهم ونتيمع ويا بعض ونسولف .