((حصري)) كووورة اجرت هذا اللقاء مع المعلق المصري -حاتم بطيشة- ((حصري))

يسر

منتدى الكورة المصرية وموقع كورة بعد طول انتظار كبير جدا يسعدني أن أستضيف المعلق المصري  صاحب الصوت الجميل والرائع ,

الكابتن المحبوب

(

حاتم بطيشه )

فى حوار طويل ومثير جدا يرد فى على اسئلة الاعضاء بالكامل حوار من القلب للقلب حوار من نار مع عندليب التعليق المصري ونحن معكم اعضاء هذا المنتدى الكرام وزواره الافاضل بحوار جريء وجميل ومفتوح لكل الزائرين لهذا المنتدى

بطاقة تعارف

الاسم حاتم عمر بطيشه 

السن 35 سنة

التخرج كلية الشرطة

متزوج وعندي 3 بنات 

محل الاقامه المهندسين

 نبدأ بأسئلة الاعضاء الكرام

سؤال العضو احمد عقبي

ما هو مشوار الكابتن حاتم بطيشة مع كرة القدم كلاعب قبل ان يكون معلق؟

بالنسبة للمشوار ماكنش طويل فى البداية انا محب لكرة القدم جدا من و انا صغير

المشوار كلعب بدأ فى نادى هليوبليس تحت 16 سنة لعبت تقريبا سنتين تحت السن لغاية تحت18 و تحت 19 كان فى موسم86 و 87 طبعا جاءت بعد كدة الثانوية العامة اجبرتنى أن ابتعد شوية و كمان دخولى بعد كدة الكلية كانت صعبة جدا لأنى كنت فى كلية الشرطة فكان مستحيل الواحد يوفق بين مواعيد الكلية و التمرين فأكتفيت باللعب لفريق الكلية طبعا لغاية ما تخرجت و بعد كدة الموضوع باظ و تفرغت بعد ذلك للمشاهدة لكن انا حريص حتى الأن ان العب مع الاصدقاء و لو مرة فى الاسبوع

سؤال العضو NIKE

سؤال بسيط معلش احنا والله بنحب الكابتن حاتم اوى بس ليه هو ديما ضد النادى المصرى يعنى لما بيعلق على لقاء للمصرى ديما بيبقى ضده

بالعكس انا مقل جدا فى الماتشات المحلية حتى فى الموسم دة انا لم اعلق غير على حوالى 4 او 6 مباريات سواء فى الدورى او الكاس

مش عارف الانطباع دة جاء منين بالعكس انا بحب النادى المصرى و بحب بورسعيد جدا و اهلها بيحبوا الكرة جدا و شعب بورسعيد محب جدا لنادية و انا بحترم فيهم جدا الكلام دة و لما بيكون عندى مبارة فى بورسعيد بكون سعيد جدا و متحمس فأصاب بعدوى الحماس اثناء وجودى فى بورسعيد للتعليق على مباراة المصرى

فأرجوا ان الصورة دى تتغيرفى الفترة القادمة ان شاء الله

الفرعون اسلام

سؤال للعضو

اية اخر اخبار استاد القاهرة ووصلة الرسالة دى قولة احلا اتنين مذيعين مصريين من راى الفرعون اسلام حاتم بطيشة وعلى محمد على ووصلة سلامتى

بشكرك جدا يا اسلام على كلامك وتقديرك

بالنسبة لاأستاد القاهرة احنا بنتابع زينا زى بقية الناس و لكن انا حاسس ان الوقت لم يكن فى صالحنا احنا لانة قيل قبل كدة انة هيفتتح فى الصيف السنة دى و بعد كدة فى اكتوبر و اخر ميعاد فى نوفمبر

و انا اخشى ما اخشاة ان احنا نفاجئ بأفتتاح الاستاد هيتاجل الى ليلة افتتاح كاس الامم الافريقية وتبتدى تظهر العيوب و الثغرات فانا شايف ان الموضوع لازم يكون فى شفافية اكثر من كدة لازم يتقال ونبقى عارفين اية اللى بيحصل جوة الاستاد اية اللى تم و اية اللى فاضل و اية و الاعمال المتبقية لان فعلا فى حالة قلق من الموضوع دة و عيب ان الاستاد الاول فى مصر يبقى مقفول من سنتين او اكثر و الاندية بتتسول ملاعب تلعب عليها و الوضع بصفة عامة غلط طول فترة الاصلاح فى الاستاد اللى عدت سنتين دلوقتى تدعوا للقلق هما لو كانوا هدوة الاستاد و بنوة من جديد كانوا زمنهم خلصوة

فأتمنى ان الاستاد يخلص قريبا

سؤال العضو elahly ya gamaloh

السؤال هو بعد اخفاق منتخب الشباب فى كاس العالم مع العلم ان هذا المنتخب هو امل مصر و المرشح لتصفيات بكين ما هى توقعات و رؤى الكابتن حاتم بطيشة لمستقبل الكرة المصرية و خصوصا بعد تولى سمير زاهر مسؤلية اتحاد الكرة ؟ و شكرا

منتخب الشباب اصبنا بصدمة بالمستوى اللى ظهر علية سواء فنيا او سلوكيا

فأنا من ساعة ما اتفرجت على منتخبات الشباب من سنة 81 فى البطولة اللى كان فيها الكابتن طاهر ابو زيد و محمد حلمى و غيرهم جيل 81 اللى هو وصل لدور ال 8 فى استراليا

اما بطولة 2005 اللى فى هولندا اسوأ منتخب شباب شوفتة فى حياتى طول الفترة دى خلال 24 سنة و احنا مش عاوزين برضو نقصوى عليهم اللى حصل دة كان متوقع نتيجة العك الادارى اللى كانت فية الكرة المصرية فى الفترة اللى فاتت طول السنة الماضية بسبب عدم الاستقرار على اتحاد كرة معين و كان هذا من الممكن ان يؤثر على منتخب حسن شحاتة لولا نجاح حسن شحاتة فى عزل الاعيبة و الجهاز الفنى

ولكن كان محمد رضوان فى الفترة اللى فاتت واجة ظروف صعبة و حوادث و مشاكل فكل دة اثر علية و على تركيزة مع المنتخب فكان من الواجب علية ان يعتذر علشان يرفع الحرج عن الاتحاد حتى يجد البديل لكن هذا لم يحصل فكان من المتوقع النتيجة اللى حصلت ولكن مش عاوزين نظلم الاعيبة ولكن الصورة اللى ظهر بها المنتخب هى صورة سيئة فأحتل المركز قبل الاخير فكان المنتخب اللى بعدة هو الهندوراس

سؤال العضو gamalov

اريد فقط ان اسجل اعجابي بالكابتن حاتم و تمنياتي بالتقدم الدائم انشاء الله

اشكرك جدا فكل كلمة تقدير بتحملنى المزيد من المسئولية حتى اكون عند حسن ظن المشاهدين و الجمهور و اوعدكم ان ابذل المزيد من الجهد فى العمل علشان افضل محافظ على الثقة الغالية دى

سؤال العضو حب الزمالك فى دمى

تسالة اية راية فى المستوى اللى ظهر علية لاعبى منتخب الشباب و مين مسؤال عن اللى حصل دة و كمان عايز اعرف هل فعلا نظام المجموعتين هايطبق وولا دة كلة كلام جرايد وقولة انة من اكتر المعلقين اللى بستمتع لما يعلق على ماتشات جدااااا

اشكرك جدا على كلامك

اما بخصوص موضوع المجموعتين او المجموعة الواحدة فالاتحاد المصرى الجديد قال معندوش فواتير انتخابية يسددها و انا ممكن كنت اقتنع بالكلام دة أو أوافق علية لولا اللى لمسناة من و جود اصرار ووعود أنتخابية فعلا مش عارف لية دايما الناس بتعملنا ان احنا لم نبلغ سن الرشد بعد

لا كان فى وعود و كان فية حلفان على المصحف و قسم باغلظ الايمان ان انتخبتونا هنعملوكم مجموعتين و مفش فرق هتنزل و كان بالفعل دة اللى حصل انا كان نفسى بس علشان يثبتوا انهم معندهمش فواتير انتخابية للتسديد فكان اوكية ماشى نظام المجموعتين يطبق من السنة القادمة مش السنة دى و الحمد لله ان دة اللى استقرة علية الراى و هو اللى حصل بالفعل رغم انة يطبق على الدرجة الثانية حاليا

سؤال العضو elahlawy_2007 لو كلف استاذ حاتم باذاعة لقاء غير متوفر عنه معلومات بالدرجه الكافيه ما المصدر الذى يحصل منه على المعلومات ؟؟ أو بمعنى أصح بيحضر لمثل هذه المباريات من أى مصدر ؟؟؟

طبعا بتكون مشكلة لكن التعليق هو فى الاساس

اولا: موهبة

ثانيا: مهنة اعلامية

لان فى ناس كتير بتغلط متخيلين انة جزء من العمل الرياضى مثل الاعب او المدرب او مجلس الادارة لا هو عمل اعلامى فهو قصة ثانية لازم الاول يكون عندة موهبة العمل الاعلامى و يكون عندة قبول من الناس انت عارف لما تقابل واحد و يقولك وشك فية قبول و كذلك الصوت فلما تسمع صوت واحد ممكن يدخل قلبك على طول و ممكن فى شخص تشعر معة بعدم القبول و متبقاش قادر تسمع صوتة فالمعلق اذا توافر فية كل هذة الخصائص فيجب علية ان ينمى الموهبة دى فلازم ان يهتم بعملة بالاعداد الجيد لهذا الامر يعنى لو عندى ماتش الاسبوع القادم لازم اعد لة من دلوقتى و لازم الم و اجمع معلومات عامة عن الفريقين مش اسماء اللعيبة بس اية و لكن اية اسم المدينة اللى هيتلعب فيها المباراة و اية هى الظروف التى تحوط بهذة المباراة و مين اللعيبة اللى هتلعب و اللى مش هتلعب و مش هتلعب لية بسبب اصابة و لة انذار و لة مشاكل اى كل المعلومات المتعلقة بالمباراة و الحكام و الجمهور

و زى العضو الفاضل قال ان فى مباريات لم تكن لها معلومات متاحة ودة واجهناة كتير فى بدايات قناة النيل للرياضة كنا بنكلف احيانا بمباريات ما انزل اله بها من سلطان تلاقى فريقين ملهمش اى دعوة بالدنيا و الماتش عندك هتعمل اية هقولك على حاجة اولا كمصدر اساسى دلوقتى المعلومات على الانترنت وفرت كتير و سهلت كتير

ثانيا الجرائد و المجالات الرياضية المتخصصةحتى لو فى وسيلة اتصال شخصية بجانب متعلق بهذة المباراة و مثلا فى سنة 98 اول لما بدانا التعليق كان فى كأس العالم 98 فكان طبعا فى مشاكل كتيرة اخذت على كثير من المعلقين فى نطق اسماء اللعيبة و هذا بينطق غلط فكلنا كجيل طالعين مع بعض كنا بنكلم سفارات الدولة مثلا كان عندى مباراة النمسا و تشيلى فكلمت السفارتين اخذت النطق الصحيح لاسماء الفريقين و باقية المباريات نفس القصة لو معنديش معلومات عنها لان مصادر المعلومات محدودة فانت بتعمل اللى عليك و تحاول تبذل اقصى جهد انك تلاقى اى معلومة خاصة بالفريقين او المباراة و يكفى شرف المحاولة

a

سؤال العضو a_salah84 1_ اكتر دورى بيتابعه ؟

2_ 

ارجو ان يشرح لنا كيفية اختيار المعلقين فى التلفزيون المصرى؟

لا انا بتابع كلة بحكم حبى للكرة اولأ و عاوز اقول حاجة انا شغلتى موزيع و معلق فقط يعنى انا معنديش شغلانة تانية انا بتعجب من الناس اللى بيشتغلوا ( 7) و(8) و (10) و(15) و (20) شغلانة بجد انا بحسدهم على هذة القدرة فبالتالى بتابع المباريات بحكم حبى للموضوع و فى نفس الوقت بحكم شغلى فبتابع الدوريات المتاحة سواء الانجليزى او الاسبانى او الايطالى او الفرنسى او الهولندى و احيانا البرتغالى

لكن بستمتع بأية فيهم فكل دورى فى ميزة معينة فالدورى الايطالى تستمتع بالتكتس بتاعة الفرق فهناك حروب تكتيكية فى كل مباراة اما الدورى الاسبانى اللعب الهجومى و المتعة التهديفية اما الدورى الانجليزى فهو متعة مختلفة فالجمهور لة تأثير كبير جدا بسبب الحضور الجماهيرى فمفيش مباراة تلاقى مكان فاضى فالاستاد كلة مليان فهذا يكون لة تأثير على الاعيبة و المباراة بصفة عامة فالدورى الانجليزى مثير جدا ولكل دورى لة ميزة و مذاقة الخاص

اجابة على السؤال الثانى

فالتلفزيون جرت العادة انة لم يعمل اى اختبارات و لكنة يأخذ من المعلقين المعتمدين من الاذاعة و قناة النيل فالاختبارات يكون لها بصفة عامة شروط عامة :

اولا: سن محدد ففى اخر اختبار لقناة النيل او الاذاعة كان لا يزيد سن المعلق عن 45 سنة

ثانيا: ان يكون مارس كرة القدم سواء فى الدرجة الاولى او الثانية فهذا يختلف من اختبار للاخر

ثالثا: انة على الاقل يجيد لغة اجنبية واحدة

رابعا: الثقافة العامة

خامسا: القبول

سادسا: الصوت المقبول

كلها شروط عامة و انا مش هنسى الاختبار بتاعى اللى كنا فية فى قناة النيل سنة 98 فهذة من اللحظات التاريخية بالنسبة لى لان اللجنة عندنا كان فيها عمالقة مثل الكابتن ميمى الشربينى و الكابتن عصام عبد المنعم و الكابتن عبد العزيز الشافعى و الكابتن حسين فهمى الحكم السابق و استاذ حسام الدين فرحات (رئيس القناة سابقا ) و استاذ حسن حامد (رئيس قطاع القنوات المتخصصة وقتها) يعنى كانت نخبة من الاسماء الكبيرة سواء فى العمل الرياضى او الاعلامى

فكانوا بيوزعوا ورقة فيها ماتش برما و بوروسيا دورتموند كان فى بطولة على اساس أنك تكون عارف اسماء اللاعيبة و انت داخل فبتدخل مقابلة (انتر فيوة) بيسألوك اسئلة معلومات عامة و اسئلة رياضية حتى يشوفوا أنك بتابع والة لأة بعد ذلك بتدخل على كبينة التعليق و امامك مينوتور و بيعرضوا عليك جزء من الماتش اللى وزعوا عليك اسماءة قبل ماتدخل فيشوفوا تعليقك على جزء من الماتش حتى يعرفوا نطقك و يشوفوا متبعتك للكرة و الحمد لله ان ربنا وفقنا كل جيل 98

فان كلنا لما نجحنا مع بعض و هم على محمد على و خالد لطيف و احمد الطيب و طارق الادور و انا فالشئ الغريب و اللى الكل لحظة ان احنا مرتبطين اوى مع بعض بعد مانجحنا و الموضوع أتحول الى صداقة فدلوقتى ماشاء الله معظم الاسماء اللى انا قولتها تخاطفتهم معظم المحطات الرياضية العربية و الباقى اثبت نفسة هنا و الحمد لله

سؤال العضو MohamedMagdy سؤال محدش سأله

بعد اذنك طبعا

 يا كابتن حاتم بصفتك اعلامى معروف ووالدك اعلامى كبيرايه رأى سيادتك فى موضوع التصوير الفيديو السئ من المباريات هل الخطأ من جانب وزارة الاعلام لعدم وجود الامكانيات ام من جانب المجموعة المسئولة عن نقل المباراة على الهواء من مخرجين ومساعدين ومنتجين  وما دور المعلق فى رسم الواقع الفعلى لاحداث المباراة  فكلنا لا ننسى ما قاله الكابتن لطيف عن مباراة مصر والجزائر 1990 فهل من حق المعلق ان يتكلم لمصلحة فريقه ام يقول ما يحدث بغض النظر ان كان فى مصلحة بلاده او ضدها

نقل المباريات بصفة عامة مأساة بكل المقايس فأحنا تأخرنا كثيرا حوالى 30 سنة مش هقول عن نقل ماتشات اوروبا لا دة حتى فى الدول العربية مثل كأس الخليج الاخير فنقل على أعلى مستوى فالسبب هو الادارة لا مشكلة كاميرات و لا امكانيات ولا اجهزة و لا كرينات فهى مشكلة الادارة فهى لا تجيد توظيف هذة الامكانيات و لاتحفيز المخرجين و المصورين على العمل بأبداع و اخراج احسن ما عندهم يعنى تخيل ان المبنى الديناصورى و هو مبنى التلفزيون الذى يضم الاف مؤلفة من الموظفين يعجز عن نقل مباراة بصورة جيدة فهى مشكلة ادارة و ايضا مشكلة تخصص .

* فبالنسبة لجزئية كابتن لطيف فهو اللى حببنا فى الكرة و عرفنا الكرة على أيدة كجلنا احنا فكابتن لطيف كان بيتكلم بتلقائية جدا و كانت يمكن ميزة فية فحببت الناس كلها فى الكرة و فى كابتن لطيف .

* كابتن لطيف كان دة ممكن يكون مقبول فى زمن الكابتن لطيف فالمباراة اللى العضو سأل عليها مباراة مصر و الجزائر سنة 83 كان كابتن لطيف بيعلق للتلفزيون المصرى على القناة الثانية فكانت مصر بس اللى بتشوفها فلايوجد فضائيات حتى الاخوة فى الجزائر يشاهدوة المباراة و يسمعوا تعليق الكابتن لطيف فالموضوع كان مختلف .

*ماينفعش ان اطلع اعلق على مباراة لمنتخب مصر و اتكلم لمصلحتة بالرغم أنى أكيد طبعا متعاطف و منحاز لة و لكن مش بصورة ممكن تدفع الفريق المنافس أن يشعروا أنى بأقلل من شأنهم

ولكن دلوقتى أصبحت السما مفتوحة اللى عاوز يسمع حاجة بيسمعها و لكن الوقت اللى بيتكلم علية العضو اكيد كان

الزمن اختلف .

سؤال العضو ahlawi samem

التحية والسلام لمعلق ومذيع رياضى محبوبالكابتن حاتم والدك العظيم الإعلامى والشاعر عمر بطيشة من كبار مشجعى ومؤيدى نادى الزمالك أما أنت فأهلاوى بشدة هذا رأيى صح أم خطأ برنامجك الناجح بقناة النيل للرياضة التحكيم فى إسبوع رائع بس محتاج بعض التطويرومحتاج إختصار بعض اللعبات التى لا تستحق التعليق عليها تحكيميآ أقصد مش كل لعبة أو قرار يحتاج تحليل إختصارآ للزمن والتركيز  تقبل تحياتى

السؤال الاول:

الانتماء دة شئ جميل لازم كلنا يكون لنا انتماء أنما اللى انا يهمنى و يهم الجمهور ان هذا الانتماء هل بيأثر على شغلى ام لا انا بأكدلك و بأكد للجميع أنى طالما قعدت خلف الميكروفون و انا متأكد ان اى معلق بيحاول يعمل كدة بينحى انتماءة جانبا علشان مايؤثر ذلك على شغلة اية اللى هيفدنى ان اجامل فرقتى و اخسر جمهور الفريق المنافس و اية اللى هيفدنى فى شغلى كمعلق الانتماء جميل جدا لكن فى بيتنا

السؤال الثانى:

اتفق معاك ان فى بعض الملاحظات على البرنامج لكن ان شاء الله فى الموسم الجديد نحاول ان نتلافها و نطلع بشكل افضل ينول الرضا

سؤال العضو yhgn

ماهى اخر استعدادات مصر لكاس الامم وليه مافيش اهتمام اعلامى كافى ؟

احنا كمعلقين نهتم بالبطولة ازاى أولا دة مش دورنا كمعلقين دة دور اللجنة المنظمة و دور وزارة الشباب و دور اتحاد الكورة و كأعلام ممكن الصحافة الرياضية او الاعلام المرئى حتى كبرامج فى التلفزيون و لكن كمعلق ملهوش دور فى البطولة الا لما تبدئ المباريات

و أنا معاك فعلا انة هو فى تقصير واضح بسبب المشاكل الادارية الكثيرة اللى عاشتها الكورة المصرية فى الفترة الاخيرة و احنا اتعودنا على كدة للأسف ان أحنا ما نشتغلش الا فى اللحظة الاخيرة لما نحس بالخطر و لما نحس بأن الوقت قزف فنبتدى نشتغل و نبتدى نتحرك فى كل الاتجاهات و طبعا دة غلط احنا شيفين الصين هتنظم اولمبياد 2008 و احنا فى 2005 و من شهرين اختارة الاغنية اللى هتتغنى فى حفلة الافتتاح و احنا هنا لم نعرف اى حاجة عن البطولة فى تقصير طبعا و فية تأخير نتمنى الموضوع ان يعدى على خير لأن أحنا ممكن ان ننظم أمم ماشى و لكن أحنا مش عاوزين مجرد تنظيم أة ماتشات بتتلعب و خلاص و لكن أحنا عاوزين تنظيم يفوق كل البطولات السابقة و يليق بمصر لانها أول دولة فى افريقيا عرفت الكورة فالما تنظم بطولة افريقيا فلازم ان يكون التنظيم يليق بها

سؤال العضو A_attia

سؤالي للكابتن حاتم

ما هو اصعب ماتش علقت عليه ؟

وايه الماتش اللي كان نفسك تعلق عليه ؟

وشكرا

....

السؤال الأول:

* أصعب ماتش محليا طبعا هى مباراة الأهلى و الزمالك فيكون فيها صعوبة شديدة

* أصعب ماتش دولى فى مونديال كأس العالم 2002 لأن حجز الكابينة فى كوريا و اليابان كان غالى جدا فقرروا بأن يكتفوا بالمعلقين بأن يقوموا بالتعليق من الأستوديو فوقع الاختيار على (5) معلقين وارتفعوا الى (8)هم الذين قاموا بالتعليق على المونديال فالحمد لله فكنت من ضمنهم فمن أصعب التجارب لانة فى منتهى الصعوبة انك تكون قاعد بتعلق من الاستوديوعلى بطولة كبيرة زى دى فمطلوب منك ان تنقل المشاهد لقلب الحدث فطبعا المفروض و الأفضل فكل ما كان التعليق من الملعب و من قلب الحدث دة بيساعدك كمعلق وبيكون أجمل للمشاهد اللى بيتفرج عليك مش لمجرد أن المعلق يكون قاعد فى الملعب بس لا و لكن يكون قريب حتى من الاعبين و يروح لمقر المنتخب الايطالى مثلا و يعرف اخر الاخبار و يشوف الجو أية فى المعسكر فى مقر اى فريق كالايطالى او الفرنسى او الهولندى او اى منتخب انك تشوف الجمهور فى الشارع عامل أزاى و أنك تعيش الجو دة مهم جدا بالنسبة للمعلق و بالنسبة للشغل بصفة عامة فطبعا كانت التجربة صعبة جدا فكان أختبار صعب جدا أنك تعلق على بطولة هامة من خلال حجرة و الحمد لله تمت على خير و الناس أشادت و ماكنش فى أنتقادات كثيرة .

بخصوص السؤال الثانى:

كان فى ماتش نفسى أعلق علية و فعلا علقت علية من خلال أذاعة الشباب و الرياضة و هو نهائى كأس القارات الأخيراللى كان بين البرازيل و الأرجنتين دة فعلا من أمتع المباريات اللى أتفرجت عليها فى حياتى و كان نفسى أعلق علية من الملعب يعنى أكون موجود فى الملعب و أعيش الجو اللى كان موجود و أكون عايش الأستعراض الكروى الرهيب اللى أحنا شهدناة فى المباراة النهائية و أن أعيش من قلب الحدث فكان هيفرق معاية كتير بالرغم أنى علقت علية من خلال الأذاعة

محمود الحوتي

من هو افضل معلق كرة قدم في مصر من وجهة نظرك دون الهروب من السؤال ؟

فهناك معلقين كبار و هو جيل الاساتذة اللى أحنا بنتعلم منهم لغاية دلوقتى و فى الجيل بتاعنا فى ناس متميزين جدا سواء اللى بيشتغلوا هنا فى مصر أو فى القنوات العربية فامقدرش أحدد أسامى لأنى هظلم ناس كثيرة لية أحنا متخايلين ان هناك واحد بس لية صيغة التفضيل فالتعليق دة أذواق أية المانع أنك تحبهم كلهم و لكن الناس تتفق على واحد ممكن أنك تحب معلق ومقتنع بة جدا وواحد تانى ما بيحبهوش ومش قابلة هى بس المشكلة عندنا ان التعليق فى مصر مفهوش أحترافية و لكن أجتهاد بمعنى أنة مفيش عقد يربط بين المعلق و القناة اللى بيعمل فيها فالموضوع شغال بالبركة و بالتالى كثرة المعلقين جدا و كل واحد فيهم عندة شغل تانى بيشتغلة و بيعلق وقت فراغة فبالتالى الموضوع أجتهادى فمن الممكن ان يصيب أو يخطأ المعلق و من هنا يحدث الأنتقادات الكثيرة.

انتهينا من أسئلة الاعضاء الكرام والاعزاء .

والان أسئلة العضو

 (  عاشق المستدرة اسلام )

 ونكمل المشوار ياكابتن وأعذرني على الاسئلة الكثيرة .

سؤال العضو عاشق المستديرة اسلام

ما هي أول مبارة علقت عليها كابتن حاتم؟

كانت الأهلى و المقاولون فى ختام موسم 97 -98

سؤال العضو عاشق المستديرة اسلام

ماهى المباراة التى علقت عليها و تمنيت أن تنساها ؟

دية حاجة غريبة أن أنا مفيش مباراة خرجت منها بعد ماخلصت تعليق و أنا راضى عن نفسى بنسبة 100% مفيش ماحصلتش طول ال 7 سنين الماضية دائما بسعى للأفضل ولو حسيت أنة ليس فى الأمكان أبدع مما كان أعتذر فورا أكرملى .

* لكن من أسوء المباريات مباراة مصر و السودان الأخيرة رغم انها لم تكن سيئة أوى و لكن الظروف و الأجواء اللى كانت موجودة لأن للأسف الأستاد لم يكن فية كابينة تعليق فكنت قاعد فى وسط زحمة فصعب جدا فالمعلق من المفروض أن يكون مندمج مع المباراة و مفيش حاجة تقطع تركيزة و لكن لما تلاقى كل ماتتكلم واحد يعلق على كلامك أو يدخل معاك فى حوار و أحنا على الهواء فاطبعا كانت مشكلة كبيرة أتمنى أن يكون فى أهتمام أكبر بأماكن المعلقين فى الأستادات .

سؤال العضو عاشق المستديرة اسلام

كرة القدم المصرية كانت و لا زالت تمتلك خامات كروية مبدعة حاليا مثل عماد متعب و أبو تريكة و ميدو و أحمد حسن

و من النجوم السابقين هادى خشبة وياسر ريان وحسام و ابراهيم حسن فهل الجيل السابق لمنتخب مصر هو الأفضل فنيا أم الجيل الحالى ؟

الكرة تختلف فلو أتكلمت عن جيل السبعينيات فكان فية كمية مواهب لا تعد و لا تحصى ومع ذلك لم يكن لهم أى أنجاز لا على الساحة الأفريقية و لا وصلة كأس العالم مع أن كان فى مواهب رهيبة فكل جيل ظروف الكرة فية بتختلف .

* مشكلة مصر مش مشكلة منتخب و لا لاعيبة و لا مدرب و لا جهاز فنى و لا أتحاد كورة دية مشكلة مجتمع ينظر للكورة على أنها لعبة أو تسلية أو تضيع وقت بالرغم أن العالم كلة بينظر للموضوع على أنة صناعة و تجارة تدار بالمليارات و فيها أرباح لكن عندنا النظام نفسة محتاج أن يونسف و أن يعاد تنظيمة من جديد لازم أن يكون عندنا قاعدة كويسة لان الأحتراف لا ينفع معانا لظروف المجتمع الذى لا يسمح أحتراف الاعيبة فى سن مبكر بسبب ظروف الدراسة و ما الى ذلك و لاتسمح بالتجنيس زى ماعملت تونس و كانت قطر عاوزة تعمل كدة و لكن أحنا لا نسمح بالتجنيس أذن الحل الوحيد هو أنشاء قاعدة قوية لان لو كانت عندنا قاعدة قوية هيبقى عندنا أساس كويس للأختيار زمان كانت القاعدة موجودة عندنا لان كان فى رياضة فى المدارس بعكس دلوقتى أذن الحل هو أنشاء ملاعب بدل من الخربات اللى موجودة و منتشرة فالدولة لابد أن تحولها ألى ملاعب فلو أنتشرت الملاعب هتظهر مواهب كتيرة أى يبقى عندك قاعدة كبيرة تختار منها مش أنت قاعد منذ 5 سنين بدور على ظهير أيمن للمنتخب و رأس حربة من بعد حسام حسن أنت معندكش قاعدة أصلا .

سؤال العضو عاشق المستديرة اسلام

ماهو المنتخب العالمي و العربي والافريقي المفضل للكابتن حاتم بطيشه؟

* المنتخب العالمى أنا بحب المنتخب الهولندى جدا و بحب الكورة اللى بيلعبوها بالرغم ان حظهم سيئ جدا و نصيبهم من البطولات قليل و لم يأخذوا غير بطولة واحدة 88 لكن بتعاطف دائما معاهم

* المنتخب العربى منتخب مصر طبعا بدون كلام

* المنتخب الافريقى مفيش منتخب افريقى معين بظروفها على حسب التعاطف ساعة الماتش

سؤال العضو عاشق المستديرة اسلام

ماهو فريقك العالمي المفضل للكابتن حاتم بطيشه؟

على حسب كل دورى منقدرش نقول بالمطلق و لكن بحب نادى أندهوفن الهولاندى

سؤال العضو عاشق المستديرة اسلام

:

ماهي صفات المعلق الناجح والمميز في رأيك ؟ 

أولا :الموهبة:-

ثانيا : الحس الأعلامى :-

زى ما أنا قلت فهى وظيفة أولأهى دة مهنة أعلامية و ليس مهنة رياضية فلابد أن يتوافر لدى من يعمل فى هذة المهنة الحس الأعلامى يعنى أزاى يكون قادر يخاطب الجمهور فلما الواحد بيكون عندة تعليق على ماتش لما بيتكلم على الهوى الكلمة اللى بيقولها من لحظة ما بتخرج منة ملايين من الناس بيسمعوها فلازم يكون عندة القدرة أزاى يخاطب الجمهور

ثالثا : القبول :-

رابعا : الصوت المقبول :- فيكون صوتة ينفذ الى قلوب المشاهدين

خامسا : الشخصية :- لازم يكون قادر على فرض شخصيتة

سادسا : الثقافة العامة :- لازم يكون قارئ جيد جدا متتبع مش للمعلومات الكروية بس سابعا : ايجادة اللغة :- لازم يجيد لغة واحدة على الأقل

ثامنا :الأعداد الجيد :- دة يكون نابع من أحترامة للمشاهد فلازم يستعد جيدا للشغل اللى طالع بة على الهوى فعندى مباراة فلازم أحضر لها كويس و يستعد لها كويس و أعد لها كويس و فى نفس الوقت مع كثرة المعلومات و بالرغم من ذلك يأخذ على كثير من المعلقين و أحيانا أنا بكون منهم المعلومات الكثيرة اللى بتتقال فالمعلق الجيد هو اللى يجيد توظيف المعلومة فى وقتها المناسب بحيث لا يشعر المشاهد بأنها مقحمة و لا يشعر بأنها حشو أتقالت فى مكان غير مكانها أو أنة زحم عقلة بمعلومات كتيرة و بكلام كتيرملهوش لازمة فبعض المعلقين متخيلين أن المباراة 90 دقيقة فلازم أن أملئ 90 دقيقة كلام فدة غلط فلازم يكون فى فترات صمت ولازم تعطى للجمهور فترة راحة لألتقاط الأنفاس و أنت يا أخى التقط نفسك

سؤال العضو عاشق المستديرة اسلام

مارأيك في كيفية التعليق العربي ؟

هى دية مدارس فالمعلقين العرب متأثرين بالمدارس المختلفة يعنى فى المدرسة الاتينية هى اللى الكلام فيها بيكون كتير و الكلام بسرعة و تلاقية بيطول فى الكلام دة بيشد المستمع جدا و هناك مدرسة أخرى هى مدرسة التعليق الانجليزى فالكلام فيها بالمختصر المفيد كأسم اللعيب كل فين و فين فأحنا متأثرين بهذة المدارس و فية ناس بتحاول تعمل خليط من الموضوع و لكن بصفة عامة فية معلقين عرب سواء على المستوى العربى او الخليجى او على مستوى شمال افريقيا او سوريا او لبنان و هذة المناطق فيها ناس مميزين جدا وأثبتوا وجودهم تماما فى التعليق و فى القنوات اللى بيشتغلوا فيها

سؤال العضو عاشق المستديرة اسلام

هل الأستاذ عمر بطيشة كان لة دور فى دخولك مجال العليق؟

طبعا كان دور مهم و خلينا نتكلم بصراحة موضوع التوسط او الوسطة فى أى مجال فالوسطة قد تضعك على أول الطريق و لكن أنك تمشى و تكمل فى هذا الطريق دة محتاج منك مجهودك أنت لأنك لو أنت مش موهوب مش هتكمل و الأ لو كملت هتتحول ألى أضحوكة يسخر منها الجميع ودة مش موجود فى المجال الأعلامى بس و لكن فى كل المجالات و الأمثلة أمامنا كتير .

* أستفادتى من الأعلامى عمر بطيشة أستفادة كبيرة جدا و لاتنكر و أكون مقصر لو مستفدش منة من خبرتة الأعلامى الكبيرة فالأستفادة كانت من خبرتة و ليست من منصبة .

* فهناك قصة أيام لما كان رئيس الأذاعة كان من المفروض أن نعتمد فى الأذاعة كمعلقين فأنا رفضت أن أعتمد فى الأذاعة لغاية لما لقيت أن الموضوع دة مؤثر على الجيل كلة لأن مكنش ينفع أن يعتمدوا واحد بس و لكن لازم أن يعتمدونا كلنا فالموضوع دة أخر أعتماد كل الزملاء فوافقت على الأعتماد و أختبرنا ثم تم أعتمادنا فكنت مقل لأقصى درجة فى المشاركات فى الأذاعة .

سؤال العضو عاشق المستديرة اسلام

هل تعتبر نفسك محايدا عندما تعلق على المباريات ؟

دية أنا مش هقولها و لكن المشاهد اللى يقولها لكن أكيد بصفة عامة يعنى أنا بحاول أن أكون محايد و أن أنعزل تماما على اى مؤثرات خارجية اى شئ ممكن يبعدنى عن تركيزى ولو وصلت الى درجة تركيزى دية فالحياد مطلوب عند اى معلق مش عند حاتم بس

* فالمشكلة يا اسلام أن الأنتماء دة مطلوب و التعصب مرفوض فالمشكلة عندنا ان الجممهور اتعود ان يصنف المعلقين بألوان الأندية اللى بينتموا اليها زى ما أنا قولتلك أن الأنتماء ماشى بس فى البيت ما أعتقدش أن فى معلق هيسمح لنفسة ان الأنتماء يأثر على شغلة صعب جدا و أنا و الله بالعكس الحمد لله لغاية دلوقت فى هذة اللحظة فى ناس بتتهمنى من جمهور الفريقين بالأنتماء للمعسكرين الأحمر و الأبيض

سؤال العضو عاشق المستديرة اسلام

ماهو فريقك المفضل ؟

* فى الدورى الايطالى هو الأنتر ميلان

* فى الدورى الأسبانى هو ريال مدريد

* فى الدورى الأنجليزى هو الأرسنال

سؤال العضو عاشق المستديرة اسلام

ماهو توقعات كابتن حاتم للفرق المصرية فى البطولات الأفريقية ؟

* النادى الأهلى أن شاء الله أتوقع لة الوصول الى دور قبل النهائى .

* الزمالك موقفة أصعب لان فى نقص شديد جدا فى القائمة الأفريقية يعنى أعتقد اللى هيكملوة 18 أو 19 أو حتى 20 لاعيب لاقدر الله و نتمنى ألا يحدث ذلك لو حصل أصابات أو ايقافات فهتبقى أزمة و لكنة بأذن الله قادر على الوصول الى الدور قبل النهائى .

* الأسماعيلى أتوقع وصولة الى المباراة النهائية مع الجيش الملكى .

سؤال العضو عاشق المستديرة اسلام

ماهو الدربى الذى تتمنى أن تعلق علية ؟

أنا روحت حضرت دربى روما ولاتسيو من ملعب روما

* أتمنى أن أعلق على دربى بين ريال مدريد و برشلونة بشعر أن فى أجواء مثيرة يتمنى أى معلق أن يعلق علية بس طبعا كل الكلام دة من جوة الملعب مش من الأستوديو .

سؤال العضو عاشق المستديرة اسلام

ماذا قدمت لك قناة النيل للرياضية

?

قدمت

كثير هى اللى قدمتنا للناس مش أنا لوحدى و لكن كل الجيل بتاعنا و لها فضل كبير جدا و الرئيس السابق أستاذ حسام الدين فرحات لة فضل كبير جدا بعد فضل الله سبحانة و تعالى فلا ننسى أبدا فضل قناة النيل و لكن نتمنى أن تكون قادرة على المنافسة فى الفترات القادمة مع باقى القنوات أن شاء الله

سؤال العضو عاشق المستديرة اسلام

هل قناة النيل سوف تنقل أى بطولة فى الموسم القادم ؟

هو طبعا تولى قيادة قناة النيل للرياضة الزميل عبد الفتاح حسن و هو يحاول تطوير الشكل و القناة بصفة عامة لكن المنافسة فى السما المفتوحة محتاج حاجات كتيرة و محتاجة مقومات كتيرة جدا للمنافسة أتمنى أن شاء الله فى الفترة القادمة يبقى عندنا مقومات المنافسة أن أحنا نأخذ دوريات حصرية و المباريات حتى المأخوذة حصريا فى محطات تانية أحنا ممكن نشتريها و نعوض دة بحصيلة الأعلانات يعنى فى وسائل كتيرة .

عاشق المستديرة اسلام

هل فى مفاوضات للأنتقال الى قناة عربية ؟

لا مفيش مفاوضات حتى الأن أنا مستمر فى قناة النيل للرياضة

سؤال العضو عاشق المستديرة اسلام

ما القناة التى تحلم أن تعلق بها ؟

سكاى سبورتس لأنها قناة محترفة بالفعل .

سؤال العضو عاشق المستديرة اسلام

هل الكابتن حاتم بطيشة من متابعي موقع كورة وبالاخص منتدي الكرة المصرية ؟

فى أوقات كتيرة الموقع بصفة عامة بيكون مفيد جدا من ناحية المعلومات الرياضية و من ناحية المتابعة خاصة على فكرة فى الاندية العربية فى بعض المنتديات فى الصحف بتاعة الأندية بتكون مفيدة جدا فى التعليق على المباريات فى المنتدى المصرى طبعا بدخل فى أوقات كتيرة و بتابع و بتعجبنى جدا العديد من المشاركات و ان شاء الله أحاول أتابع على طول دايما بأذن الله لو فى وقت

سؤال العضو عاشق المستديرة اسلام

ماهو رأيك فى كلام بعض الجماهير العربية و المصرية حول التفاؤل و التشائم من وش المعلق ؟

الأستبشار شئ جيد أبشروا و لا تنفروا لكن التطير مش مطلوب أو التشائم منهى عنة .

 سؤال العضو عاشق المستديرة

من هو أفضل لاعب مصرى من وجهة نظر الكابتن حاتم ؟

محمد بركات كان لة دور كبير جدا فى فوز النادى الأهلى بالدورى و حسمة مبكرا .

سؤال العضو عاشق المستديرة اسلام

لو أعطيت لك الحق بوضع تشكيلة تجمع فيها نجومك المفضلين بخطتك أنت فكيف تكون التشكيلة و أضلاعها ؟

حارس المرمى

بيتر شيك

خط الدفاع

سيسينهو    جون تيرى   كولو توري   ينكولوفزكى

الوسط

رونالدينيو   لامبرد   نيدفيد    مارك فان بوميل

تيرى هنرى     أدريانو

المدرب رافاييل بينيتيز

سؤال العضو عاشق المستديرة اسلام

ماهى أمنيات كابتن حاتم الكروية و العامة ؟

الأمنيةالكروية :- الموسم الجديد طبعا أهم حدث كروى فطبعا أتمنى أن مصر تفوز بها و نعوض الأخفاق فى تصفيات المونديال

الأمنية العامة :- أننا نتعلم أزاى نختلف و يكون عندنا ثقافة الأختلاف يعنى أن نمبذ التعصب زى ما قلت أن الأنتماء مطلوب و التعصب مرفوض فلو عرفنا أزاى نختلف مع بعض هيكون حالنا مختلف فقد نختلف مع بعض و لكن يبقى الأحترام .

سؤال العضو عاشق المستديرة اسلام

كلمة أخيرة للمنتدى وزواره الكرام وأعضائه يا كابتن حاتم ؟

فى الختام أنا سعيد جدا بهذا اللقاء مع أعضاء موقع كورة و المنتدى المصرى بشكرك جدا يا أسلام على أتاحة الفرصة دية لي و بشكركم جميعا و بتمنى كل النجاح و الأزدهار لهذا الموقع الجميل و بتمنى التوفيق و النجاح لكل الأعضاء الأعزاء و أن شاء الله يكون لنا لقاء تانى قريب و أوعدكم جميعا مزيد من الجهد و العمل و أنى أحاول دائما أن أكون عند حسن الظن .شكرا

---

وصلة الموضوع في المنتدى:

http://forum.kooora.com/f.aspx?t=733383