أحمد شوبير يهاجم جهاد جريشة.. وينتقد ويمدح عموتة!

انتقد الإعلامي أحمد شوبير، اختيارات المغربي الحسين عموتة، لتشكيل الأهلي في لقاء الشرقية إنبي، الذي أقيم أمس في الجولة الأولى للدوري الممتاز المصري.

وقلب الأهلي تأخره بهدفين إلى الفوز بنتيجة 3/2، علما بأن الشرقية أنبي أهدر ركلة جزاء، ليحصد الأحمر أول 3 نقاط، وسط تذبذب واضح في المستوى.

"أخطاء عموتة في التشكيل"

وقال أحمد شوبير في تصريحات إذاعية، اليوم الإثنين: "هناك بعض الأخطاء للأهلي في مباراة الشرقية إنبي، من وجهة نظري كريم فؤاد مينفعش يلعب باك ليفت إلا اضطراري، يعني لو كريم الدبيس مش موجود أو كوكا لعب في المركز ده أكتر من مرة، أدي العيش لخبازه، لكن في النهاية وجهة نظر مدرب".

وتابع: "ياسر إبراهيم مينفعش يقعد على الدكة، طول ما هو سليم أنت كمدرب لازم تشركه، خاصة أنك رفضت إنه يمشي، لكن عموتة بيقول إن اللاعبين اللي شاركوا في كأس العالم مرهقين شوية. إمام عاشور كان مصاب وبعدها اتمرن كويس وكان عايز يتحط في القائمة، كده ممكن يكون له دور، الأهلي النهارده إجازة ولسه عنده 3 تدريبات لحد المباراة القادمة، فممكن إمام يكون موجود في القائمة حتى لو هيكون من البدلاء".

وواصل شوبير: "المهم في النهاية أن الأهلي فاز بـ 3 نقاط غالية جدًا، لأنه الموسم الماضي بدأ بالتعادل مع مودرن سبورت، والأهلي خسر الدوري الموسم اللي فات بـ 3 نقاط فقط لا غير، وبالتالي فوز غال جدًا".

وأكمل: "جماهير الأهلي كانت في حالة ذهول بعد تقدم الشرقية إنبي بهدفين مقابل لا شيء بالإضافة لإضاعة ركلة جزاء كمان، هنا بيظهر معدن اللاعيبة الخبرة زي مروان عطية، واللي سجل هدف صاروخي لا يصد. في الشوط الثاني ينجح بن شرقي في الحصول على ركلة جزاء صحيحة 100%، فيتعادل زيزو اللي عمل مباراة كويسة".

إشادة بتغييرات عموتة

وأضاف حارس الأهلي الأسبق: "عموتة عاجبني جدًا في تغييراته، قام بالدفع بسفيان بنجديدة وعلي محمود وكريم الدبيس، والمباراة ظبطت إلى درجة كبيرة جدًا جدًا، وكانت نتيجتها أن الأهلي نجح في تسجيل الهدف الثاني، ثم في الدقيقة 85 أشرك أفشة بدلا من زيزو وحسين الشحات بدلا من بن شرقي اللي أخد رجل المباراة، عمل مباراة هايلة جدًا جدًا، لكن من وجهة نظري مروان عطية هو رجل المباراة".

وزاد: "كل تغيير بيعمله عموتة بيبقى له دور في شكل اللعب، الـ 3 تغييرات الأولى الفريق تعادل، ثم التغييرات التانية جابت الفوز، وتحية لأفشة اللي تعرض لحملة هجوم قوية، والجماهير محتاجة تصبر على لاعيبتها".

يمكنكم مناقشة الموضوعات والأخبار بشكل أعمق في منتديات "كووورة"

شوبير ينتقد جهاد جريشة

وقال شوبير: "أنا أكتر واحد أحترم الآراء، أدافع بكل ما أوتيت من قوة إنك تقول رأيك حتى لو كان مختلف مع رأيي، لكن اللي يزعلني أوي أن رأيك يبقى مرتبط بمكانك، خلينا نكون أكثر وضوحـا، نتكلم على التحكيم في مصر، أول ما حد يمسك في اللجنة يقولك علطول الحكم صح ومش بيغلط، وبيطلعوا في اللقاءات يقولوا الكلام ده على الملأ، لكنه أنت موجود في اللجنة تدافع، تخرج من اللجنة نفس اللعبات اللي كنت بتتكلم عليها وأنت في اللجنة يكون رأيك العكس!".

وأوضح: "مثلاً بنتكلم على ركلة جزاء الأهلي أمس أمام الشرقية إنبي، كابتن جهاد جريشة وأحترمه جدًا، لكنه فجأة راح طالع وعمل فيديو وضربة الجزاء مش صحيحة، ماشي رأيك وبحترمه والله العظيم، لكن أنا ممكن أجيب لكم حالات كتيرة شبيهة بالحالة دي، وكابتن جهاد وافق تمامًا على قرار الحكم!".

وواصل: "خليك يا كابتن جهاد أو لأي حد تاني على رأيك، يا جماعة القانون ملوش علاقة أنت موجود في اللجنة ولا مش موجود، ملوش علاقة خالص، القانون قانون أمر عجيب وأمر غريب جدًا جدًا .. القصة مش ماشية طبقا للمنصب اللي أنا فيه أو المكان اللي أنا فيه".

الزمالك وإيقاف القيد

وانتقل شوبير للحديث عن الزمالك قائلا:''نادي الزمالك بدأ يتحرك علشان يرفع إيقاف القيد التأديبي، بيجهز كل مستنداته وكل أوراقه، وعايز يطالب بجلسة استماع من المحكمة الرياضية، عايز يكتفي بفترة إيقاف واحدة".

وتابع: "الزمالك موقوف فترتين، والمحكمة الرياضية في النهاية بتسمع، لكن الزمالك منتظر يكون مخلص كل القضايا اللي عليه، لسه ناقص عليه مستحقات نادي اتحاد طنجة في صفقة عبد الحميد معالي، ومستحقات نادي أيك السويدي في صفقة عمر فرج، الزمالك مش هيعرف يروح المحكمة الرياضية غير لما يخلص القضيتين دول، علشان عايز يعمل تسوية وجدولة معاهم، وبعدها يروح المحكمة، وده على فكرة هيحسن من موقف الزمالك في القضية''.

يمكنكم مناقشة الموضوعات والأخبار بشكل أعمق في منتديات "كووورة"