"الجمهور غير سعيد".. شوبير يهاجم عموتة بعد واقعة علي محمود

انتقد الإعلامي أحمد شوبير، المغربي الحسين عموتة، المدير الفني للأهلي المصري، بعد واقعته مع علي محمود، لاعب الفريق أمس الأربعاء.

وعقب استبدال علي محمود، خرج اللاعب وصافح مدير الكرة وائل جمعة، ثم عموتة الذي بدت عليه علامات الغضب، حيث جذب اللاعب إليه ووجه له بعض الكلمات ثم دفعه بيديه، في لقطة أثارت جدلا كبيرا.

وقال شوبير في تصريحات إذاعية اليوم: "مع خروج علي محمود إمبارح، وطبعًا أنا بتفرج على التلفزيون لحد ما جت لي الفيديوهات بالليل وشفت اللي حصل مع عموتة، كنت متصور في الأول الحقيقة إن علي غلطان، يعني علي عمل حاجة ولا قال كلمة، لأنه كانت في دفعة من الكابتن حسين عموتة لعلي، فبقيت هتجنن: ليه يا علي تعمل كده وإنت عارف النظام في النادي الأهلي وإنت ولد صغير؟. إلى أن تأكدت بما لا يدع مجالًا للشك إن الولد معملش حاجة خالص خالص خالص".

يمكنكم مناقشة الموضوعات والأخبار بشكل أعمق في منتديات كووورة

وتابع: "اتقال كلام إنه متحول للتحقيق، على إيه؟! ما هو معملش حاجة علشان يتحول للتحقيق، المدرب شايف إنه طالع زعلان، إنه طالع يعني متضايق، فالولد سلم كده بإيده، هو تعبان يعني، سلم على وائل جمعة كويس، وسلم على الراجل كده من بعيد، فيبدو إن ده أغضب مثلًا عموتة أو حاجة، وارد يعني. لكن حتى لو إنت زعلان منه، لأ، الكلام ده في غرف الملابس!".

وزاد: "مفيش مشاكل يعني، لكن فكرة إنك تدفع اللعيبة وقدام الناس، عايز تحقق حق، مفيهاش مشكلة يعني، لكن اللاعب معملش حاجة، طالع عادي، لا شاط حاجة، ولا ضرب حاجة، ولا بوز، ولا شتم، ولا عمل ولا أي حاجة! طالع زعلان عادي جدًا يعني، فكابتن عموتة ياخد باله بس من الحاجات دي، لأنه مش في صالح المجموعة كلها".

جمهور الأهلي والتعادل مع المقاولون

وحول تعادل الأهلي مع المقاولون 1/ أمس قال شوبير: "فنيًا جماهير الأهلي كمان مش مبسوطة من طريقة إدارة المباريات، طريقة التغييرات نفسها، في حالة عدم سعادة يعني في كيفية إدارة المباريات، في حالة عدم رضا عن كيفية إدارة مباريات، في المقابل لما تروح على موكوينا مع بيراميدز، لا، الدنيا ماشية، ما هو موكوينا كسب المصري، كسب المحلة في المحلة، كسب الجونة، كسب جورماهيا في جورماهيا 2-0، فالراجل ماشي بشكل جيد".

وتابع: "نصيحتي للكابتن حسين عموتة: اقعد مع معاونيك، شوف القصة ماشية إزاي، لأنه في النهاية جمهور الأهلي قوي، جمهور الأهلي قوي قوي جدًا كمان، وإمبارح الحقيقة الجمهور لم يقصر، كان مالي المكان بتاعه تقريبًا يعني، طبعًا مع الاحترام إن مدرجات المقاولون يعني سعتها قليلة شوية، ومع احترامي إن أنا قلت لك الأهلي لا يفضل إنه يلعب في ملعب المقاولون العرب، لكن أرجع أقول لك مرة تانية: الجماهير مش مبسوطة، مش راضية".

شوبير.. إلى أين يسير الأهلي؟

وقال حارس الأهلي الأسبق: "السؤال اللي بيشغل الرأي العام دلوقتي، هو الأهلي رايح على فين؟، في ناس كتير بتتكلم على تغيير تغيير، في تيار جارف بيتكلم عن التغيير، وهو أنت هتغير كل 5 ماتشات مدرب؟! ما أنت عملت كده مع ريبيرو، وبعدها عماد النحاس ثم توروب، حصل لغبطة كتيرة في النادي الأهلي.

وواصل: "تعادل مع المقاولون بأداء سيء جدًا جدًا جدًا.. أوعى حد يقولي إن الحكم محمود بسيوني سبب التعادل ولا خسارة نقطتين، وكويس إني مشوفتش حد بيتكلم على الحكم، وأنا مش بحب شغل المظلومية ده لا مع الأهلي ولا غيره".

يمكنكم مناقشة الموضوعات والأخبار بشكل أعمق في منتديات كووورة

وزاد: "مينفعش خالص كل كام ماتش نمشي مدرب، لازم يكون في تروي وهدوء، لكن ميمنعش أنك تقعد مع المدرب وتكلمه، جميل أنك تدي المدرب الصلاحيات الفنية كلها، لكن الأجمل أنك تقعد معاه وتشوف القصة إيه؟ لازم يكون في تواصل وحساب بين المسؤولين والمدرب أول بأول ويشوفوا الأمور عاملة إزاي".